Online-Bibliothek

805. Das Mädchen von Einöd.

[329] Von LudwigSchandein. – Westricher Mundart.

's war Jungelicht – 's is lange Jor –

Han zwe verheß sich un verschwor,

Ehr Herz war heß wie Kole;

Un 's Bärwel frei zum Välte sat:

»Ke' annre' werd geheierat,

Der Deuwel soll mich hole!«

's is Vollemond – do jolt die Gei

Un jolt un holt was Leut erbei,

Macht Hopser uf un Walzer

Warum bin so gebutzt die Leut?

Ei wescht de net, 's is Hochzig heut;

Das Bärwel un der Balzer!

's is Mitternacht – do jolt die Gei

Un jolt un holt e' Borsch erbei

Mit Auhe heß wie Kole;

Wer soll es sei'? der dut bekannt

Un packt das Bärwel bei der Hand

Un will's zum Walze hole.

's is zwölfe grad – do klat die Gei

Un klat un jat viel Angscht erbei,

Absunnerlich dem Bärwel;

Sei' Dänzer erscht is sachte kumm,

Nau' trillt er's richt im Rad erum,

Die Gei die macht e' Werwel.

So trillt er's fort – do kracht die Gei

Un kracht un macht so wüscht debei,

Un alles halt im Walzer:

Un hui er huscht das Fenschter 'naus,

M'r hört e' hell Gelächter draus,

Un 's Bärwel jomert: Balzer!

E' helle Gresch – un 's is gedan,

Un alles guckt verstört sich an,

Dann niemand is im Zweiwel:

Un wär er net wie fortgefloh,

Die Hörner schun un scharfe Klo'

Verroren jo de' Deuwel.
[329]

Zu Enöd is noch heut das Haus,

Un Eule flieje ei' un aus

Un Dauwe dann un Dole;

Un seit sich sell hot zugetrah,

Getraut sich dort ke' Braut se sah':

»Der Deuwel soll mich hole!« –